By By qui Tang Tacio
Ang hona-hona, nakagadan
posted 10-Dec-2019  ·  
2,453 views  ·   0 comments  ·  

Namroblema na an magcapirang mga taga-isla sa garibot na mga Badjao.

Ang iba ngani, napagkamalan nang mga mahabon, lalo na ngonian na panahon na mainit pa an nangyaring garadanan sa Virac y Caramoran.

Dinaog pa kan mga ini an mga regular na parapakilomos na taga-islang maogma.

Segun sa chismosong ciudadano, an mga local daa an gamit resetang kuromos na sa paribot-ribot o caya xinerox na binago an petsa. An mga Badjao, medyo high-tech na, ta an saendang pangapodan na maglimos naka-computer na, laminated pa, he! he! he!

Caya posibleng tama an pagheling kan Commission on Human Rights na an mga dayong ini mga victima nin human trafficking kan mga sindikatong gahagad nin parte sa pinakilimosan.

Sabi ngani kan CHR asin PNP, kung sadiri man sanang tipon an gagamiton, dae man mahimo kan mga Badjao na mangarkila nin jeep o bus papunta sa iba-ibang lugar o magsakay sa ferry hanggan sa islang Catandungan.

Sabi pa ngani, nangarkila pa daa ini nin maestaran kung saen sinda napadpad para maghagad nin imo.

Lo mismo daang si PBM Sonny Francisco, diniscutir na an bagay na ini sa sesyon kan junta provincial. Natural, an SP posibleng tocaron ini sa saendang paghororon, lalo na ta an mga bocal an saro sa mga numero unong magnet nin mga parapakilimos, he! he! he!

Segun sa DSWD, an dapat daang gibohon  kan mga kagharong na pigaagihan kan mga Badjao iyo na dae magtao nin limos ta iyo daa ini an nakapakusog kan saendang pagtubod na dae man nin problema kung mangilimos.

An problema sana caini ta bilang Cristiano, masakit tarikudan an gahagad nin tabang lalo na kung ibahan pa nin diit na pagkatakot. Matao na sana cadaclan tanganing dae nang problema.

Duman sa Iloilo City kan nacaaguing taon, an mga Badjao na uminabot sa sisenta pigdarakop kan mga pulis sa salang pagbalga nin ordinansa kontra sa pakilimos y pagtao nin limos.

Segun sa ordinansa, an pakilimos y pagtao nin limos iguang padusa na quinientos na bayad sa tesoreria o pagkakulong na dae malampas sa sarong taon, o biyo na an duwa.

Kan 2017, sabi kan mga Ilonggo, pinabarik ninda sa Mindanao an mga Badjao, gastos kan ciudad.

Ano daw kung an mga ini isakay man sa bus para ibyahe pa-Mindanao?

Adyan man an mga politicong iguang mga bus, si Gob Boboy na iguang RSL, si dating Cong Cesar na iguang sarong bus kapareho ni alcalde Posoy. Bahala na sinda mangilimos nin panggasolina sa mga contratista y mga kagurubay na politico, he! he! he!

*****

Hilnga na ta sala an mga pig-post sa facebook na soboot na mga insidenteng nagpatakot sa publico (caibahan an mga macuapo ni Nestor).

Segun sa imbestigasyon kan PNP, an mga dae namidbid na mga tawong nanoktok sa Viga mga Badjao man sana palan na nangilimos.

Ito man daang soboot iguang duwang aqui na pinatakot nin tolong lalaking armado nin tarom, an insidente daa nangyari pa anom na taon na an nacaagui y saro man kan Hulyo taon na ini.

An osipon man nin sarong comediante na nakahiling siya nin lalaking armado nin tabak na sakay nin motor kaibahan an duwa pang lalaki na labo an shorts dae man palan nin camogtacan. Dae man daang pigagibong maraot an mga ini y posibleng mga paraoma ining paparibod na sa harong.

An pangapodan kan pulis y mga lideres sa capitolyo maghuway-huway sa pag-post sa facebook, lalo na kung bako man na totoo o caya suspetsa man sana. Masakit an hona-hona, nakagadan…


0 comments
new to catanduanestribune.com?
connect with us to leave a comment.
connect thru
Cancel
Cancel
Cancel
Other Isip-isipon Ta articles
home home album photo album blogs blogs